“Дуслык” халык бию ансамбле Великий Устюг шәhәрендә узган “Кышкы әкият“ Халыкара конкурс-фестивалендә Гран-при иясе булды hәм РФ Мәдәният министрлыгы ярдәмендә “Дөнья уч төбендә” Халыкара хәйрия фонды уздырган конкурс-фестивальләрнеӊ берсендә катнашу өчен 10 процентлы ташламага сертификат алды.
hәм менә ата-аналар hәм балалар Рәсәйнеӊ төньяк башкаласын яулау турында бердәм карар кабул иттеләр.
“Дуслыклылар” үзләренеӊ яӊа ел каникулларын Санкт-Петербург шәhәрендә “Төньяк Венеция” Халыкара конкурс-фестивалендә уздырдылар.
Сәфәребез мәдәни-иҗат программасы тәэсирләре белән тулы булды.
Килү көнендә без Санкт-Петербург океанариумына бардык, яӊа ел ярминкәсендә йөрдек. Ә кичен кунакханәнеӊ барлык катларында hәм коридорларында илебезнеӊ төрле почмакларыннан килгән бию коллективлары репетиция ясады.
hәм менә — конкурс көне! Чыгышыбызны тәмамлагач, бүләкләү тантанасына кадәр без Исаакий соборындагы күзәтү мәйданчыгына күтәрелергә, архитектура hәйкәлләрен карарга булдык.
Аннан кайткач, Гала-концерт программасына эләгүбезне белдек. Бик дулкынландыргыч булды, чөнки жюри составында күренекле хореографлар бар иде. Жюри безне иӊ яхшы коллектив итеп таныды, барча зурлар hәм балалар ансамбльләрен узып, конкурсныӊ төп призын – Гран-прины hәм “Дөнья уч төбендә” Халыкара хәйрия фондыннан конкурс-фестивальләрнеӊ берсенә 25 меӊ сум күләмендә грант алдык! Калган көннәрдә без шәhәр буенча экскурсия ясадык, Эрмитажда, Петр I Кунсткамерасында hәм шәhәрнеӊ башка истәлекле урыннарында булдык.
Балалар Рәсәй hәм Санкт-Петербург тарихлары турында күп яӊа мәгълүматлар алды.
“Дуслыклылар” хәтерендә бу әкияттәгедәй матур шәhәр озакка калачак.
Конкурс hәм фестивальләргә сәфәр оештыру өчен hәрчак вакыт hәм средстволар табучы балаларныӊ ата-аналарына рәхмәт белдерәсе, аларга сәламәтлек hәм бәхет телисе килә.
Гүзәл НУРИХАНОВА, коллективныӊ иҗат җитәкчесе.